Vonn gots gnaden Friderich, hertzog zu Sachssenn vnnd Churfurst (etc.)
Burgermaister, rath unnd gantze gemein vnnser stat Wittennberg, liebenn getrewen. Nachdem ir, der rath, vnns ytzo geschrybeben vnnd einen newen rath, welchen ir auff ewer eydt vnnd pflicht, gekorn, ernant habt, bittennd, euch denn zubestettigenn. Demnach bestettigenn wir euch Cristannen Beyr, Doctor, zu einem burgermeister. Anthonien Nymeck, Mathesen Globigk, Lucassen Cranach, Cristannen Goltschmidt, Magister Lorentz Birig, Georgenn Hancke, Bartholomesn Schadewalt und Thomaßn Fewerlein zu raths freunden auff dits eingetretten jhar mit disem vnserm bryff. Darauff vonn euch dem altenn rath vnnd gantzer gemein[e] ernstlichen begerent, himit bevehlent, ir wollet dem gnantenn newen rath, das jhar vber in allen zimbichen vnd billichen sachenn zu vnnserm vnd bernoter (benötigt) vnser stat bestenn nutz vnnd fromen, willigkh gefolgig vnnd gehorsam sein vnwidersatzt.
Vnnd ewer keiner das anders halte bey vermeydung vnnser schweren straff vnd ungnade. Inn dem geschicht vnnser ernste meynung. Geben zur Lochaw mit vnnserm zuruckauffgedrucktem secret besigelt, am sontag nach Felicis in pinc[is], anno domini etc. 25 [15.01.1525].
- Transkription durch
- Lücke, Dietrich; Lücke, Monika
- Transkription Datum
- 2017
